Baby Bag

დიეტა სისხლის ჯგუფის მიხედვით - ექიმ მარი მილორავას რჩევები

დიეტა სისხლის ჯგუფის მიხედვით - ექიმ მარი მილორავას რჩევები

ექიმმა მარი მილორავამ სისხლის ჯგუფების მიხედვით სწორი კვების სტრატეგიებზე ისაუბრა. მან აღნიშნა, რომ ჯანმრთელობისთვის აუცილებელია ორგანიზმისთვის გენეტიკურად მისაღები პროდუქტებით კვება:

„სწორი წონა, პირველ რიგში, არის ჯანმრთელობა. თუ გვინდა, ვიყოთ ჯანმრთელები, ​უნდა მივიღოთ ის პროდუქტები, რომლებიც ჩვენი ორგანიზმისთვის არის გენეტიკურად მისაღები. სამედიცინო თვალსაზრისით, არის სხვადასხვა ჯგუფის სისხლი: A და B ანტიგენის შემადგენლობის მიხედვით სისხლში. პირველ ჯგუფს საერთოდ არ აქვს ეს ანტიგენი. მეორე ჯგუფს აქვს A, მესამეს B, მეოთხეს აქვს ორივე. პირველი ჯგუფის სისხლი არის ყველაზე ძველი, პირველი ადამიანის სისხლი. ამ სისხლის ასაკია 40 000 წელი. ეს სისხლი არის მონადირეების. რითი იკვებებოდნენ მონადირეები? ხორცით. რაც ძალიან მნიშვნელოვანია, პირველი ჯგუფისთვისაა წითელი ხორცი. შეგიძლიათ სიამოვნებით მიირთვათ სისხლიანი ბივშტექსები. პირველი ჯგუფისთვის ფრინველის ხორცი ნაკლებად რეკომენდებულია. პირველი ჯგუფისთვის შეიძლება ყველანაირი ბოსტნეული, უმიც, მოხარშულიც.არის ერთი ყოველდღიური ბოსტნეული, რომელიც პირველი ჯგუფისთვის არ ვარგა. ეს არის კომბოსტო. ყვავილოვანი კომბოსტოც არ არის სასურველი. სისხლის პირველ ჯგუფს აქვს ძლიერი მიდრეკილება შაქრის დონის შეცვლისადმი, ამიტომ კარტოფილი დიდი რაოდენობით არ შეიძლება. ბადრიჯანი შეიძლება, მაგრამ ისიც მცირე რაოდენობით. რაც შეეხება ხილს, სასურველია არ იყოს ციტრუსი და არ იყოს ყვითელი. ხილი უნდა იყოს წითელი, მოშავო. თუთა ძალიან კარგია, ასევე ალუბალი, ლეღვი, ქლიავი. ბალი დიდი რაოდენობით არ შეიძლება. პირველი ჯგუფისთვის არ არის სასურველი რძის პროდუქტები. შეიძლება კამეჩის სულგუნი. არ არის მისაღები ბურღულეული. პირველ ჯგუფს უმთავრესად აქვს გლუტენის აუტანლობა. შეიძლება ცოტა რაოდენობით შვრია. სულ რომ იღებენ შვრიას საუზმეზე, ასეთი რამ არ შეიძლება პირველი ჯგუფის სისხლისთვის. ძალიან კარგია ასკილის ჩაი, პიტნის და გვირილის ჩაი. საკვებისთვის გემოს მისაცემად და ნივთიერებათა ცვლის გაუმჯობესებისთვის ძალიან კარგია სანელებლები. პირველი ჯგუფისთვის კარგია კურკუმა და კარი.“

მარი მილორავას თქმით, მეორე ჯგუფის სისხლისთვის კარგია თევზეული:

„მეორე ჯგუფის სისხლისთვის ძალიან კარგია თევზეული, ასევე ზღვის პროდუქტები, განსაკუთრებით ლოკოკინა. კარგია ბურღულეულიც, განსაკუთრებით წიწიბურა და ფეტვი, შვრია - არა. დიეტების დროს მიღებულია საღამოს ცილის ჭამა, რომ გვიან ჭამა არ მოგვინდეს. შეიძლება ფრინველის ხორცი, ქათამი და ინდაური. წითელი ხორცი არ ვარგა მეორე ჯგუფის სისხლისთვის. კარგია ყვითელი ხილი, ციტრუსი, გარგარი, ატამი, ანანასი და გრეიფრუტი. სანელებლებიდან კარგია დარიჩინი. მეორე ჯგუფს აქვს უმთავრესად ლაქტოზის აუტანლობა, ​განსაკუთრებით რძე არ შეიძლება. ყველი არ არის სასურველი. მეორე ჯგუფი ეს არის მომთაბარეების ჯგუფი. ასაკი არის 25 000 წელი.“

მარი მილორავამ აღნიშნა, რომ მესამე ჯგუფის სისხლის მქონე ადამიანს კარგი საჭმლის მომნელებელი სისტემა აქვს და მისთვის თითქმის ყველაფერი მისაღებია:

„მესამე ჯგუფის სისხლი არის მიწათმოქმედების. ასაკი არის 10-15 ათასი წელი. მესამე ჯგუფს აქვს ყველაზე ძლიერი იმუნიტეტი და ყველაზე კარგი საჭმლის მომნელებელი სისტემა. მესამე ჯგუფისთვის შეიძლება პრაქტიკულად ყველაფერი. არ შეიძლება ავოკადო და ბროწეული. ყურძენი, ბანანი, ყველა ჯიშის ლობიო, კარტოფილი მესამე ჯგუფისთვის შეიძლება. ​შეიძლება ცხვრის ხორცი. მესამე ჯგუფისთვის განსაკუთრებით კარგია ხაჭო.“

„მეოთხე ჯგუფის სისხლს აქვს იმუნიტეტი კარგი, მაგრამ მომნელებელი სისტემა აქვს ძალიან ცუდი. ლობიოს ვერ იღებს მეოთხე ჯგუფის სისხლი. ​მსხვილმარცვლოვანი ბურღულეული კარგია. მეოთხე ჯგუფისთვის სასურველია რძემჟავა პროდუქტები. აუცილებლად უნდა მიირთვან მწვანე ბოსტნეული. ისტორიულად ეს არის ყველაზე თანამედროვე, 1500 წლის სისხლის ჯგუფი. სისხლის ჯგუფები მეტ-ნაკლებად განსაზღვრავს ადამიანის ხასიათს. პირველი ჯგუფის სისხლის მქონე ადამიანები არიან ლიდერები. მეორე ჯგუფის სისხლი არის ძალიან შრომისმოყვარე ხალხი. მესამე ჯგუფის სისხლის მქონეები არიან კარგი მენეჯერები. ყველაზე მეტი გენიოსი არის მეოთხე ჯგუფის სისხლით,“ - აღნიშნულ საკითხებზე მარი მილორავამ ტელეკომპანია რუსთავი 2-ის გადაცემაში „სხვა შუადღე“ ისაუბრა.

წყარო: ​„სხვა შუადღე“

არ დაგავიწყდეთ !!!

Momsedu.ge-მ თქვენთვის შექმნა ახალი სივრცე. გაწევრიანდით ჯგუფში ჯანმრთ​ელობა

რას გულისხმობს კეტოგენური დიეტა, რა დადებითი და უარყოფითი მხარეები აქვს მას და რეკომენდებუ...
დღეს სამშაბათია და მედიაპორტალი MomsEdu.ge ტრადიციულ რუბრიკას - ენდოკრინოლოგის რეკომენდაციებს წარმოგიდგენთ. ამჯერად ენდოკრინოლოგი თინათინ კაჭარავა ბოლო დროის ერთ-ერთ ყველაზე პოპულარულ დიეტაზე, კე...

შეიძლება დაინტერესდეთ

ფსიქოლოგის 7 რჩევა გადაღლილ დედებს

ფსიქოლოგის 7 რჩევა გადაღლილ დედებს

დედებს ხშირად უჭირთ იმის აღიარება, რომ ​ისინი ძალიან იღლებიან. გამუდმებული სტრესის ქვეშ ყოფნა, ბავშვების ხმაური, უწესრიგობა, საოჯახო საქმეები და საკუთარი თავის სრულად დავიწყება ქალბატონების ფსიქიკას უდიდეს ზიანს აყენებს. თუ გრძნობთ, რომ ენერგია გეცლებათ და ​ემოციურად გადაიწვით, ყურადღებით გაეცანით ჩვენს სტატიას. ჩვენ ბავშვის მოვლის წესებზე არ გესაუბრებით. ამჯერად ფსიქოლოგის რჩევებს გაგაცნობთ, რომელთა დახმარებით საკუთარი თავისთვის დროის გამონახვას და ემოციური სტაბილურობის აღდგენას შეძლებთ.

1. პრობლემის იდენტიფიცირება მნიშვნელოვანია

ბავშვის დაბადებისთანავე მშობლები გრძნობენ, რომ ისინი საკუთარ თავს აღარ ეკუთვნიან. წარმოიდგინეთ, რომ შხაპის მისაღებად შეხვედით, ამ დროს ბავშვმა გაიღვიძა და ტირილი დაიწყო. თითქოს ამაში ტრაგიკული არაფერია, მაგრამ როდესაც მსგავსი შემთხვევები ყოველდღიურად მეორდება, თქვენ იღლებით. დროთა განმავლობაში თქვენ ნერვების მოთოკვა გიჭირთ, გრძნობთ, რომ არაფერი გამოგდით, ბავშვს კი ყოველწამიერად სჭირდებით. ამ ყოველივეს დანაშაულის განცდაც ემატება. თქვენ ფიქრობთ, რომ ცუდი დედა ხართ. გარშემომყოფებს თქვენი არ ესმით. თქვენ ხომ სარეცხის მანქანა და ბავშვის საფენები გაქვთ, წლების წინ კი დედებს მსგავსი ფუფუნების საგნები არ ჰქონდათ. ნერვული სისტემა ისევე შეიძლება დაავადდეს, როგორც სხვა ორგანოები. ქრონიკული დაღლილობა ემოციურ გადაწვას იწვევს. შესაძლოა, თქვენ წვრილმანებზე ღიზიანდებოდეთ ან აპათია დაგეუფლოთ. მართალია, არ არსებობს ძალების აღდგენის უნივერსალური მეთოდი, მაგრამ კონკრეტული მიმართულებებით ბრძოლა შეგიძლიათ.

2. ემოციები მოთოკეთ და თავი ხელში აიყვანეთ

როგორც წესი, დედები მზად არიან გარშემომყოფების დასახმარებლად, მაგრამ საკუთარი თავისთვის ვერასდროს იცლიან. ​ისინი ემოციური აფეთქების შემდეგ თავს დამნაშავედ გრძნობენ და იტანჯებიან. უკეთესობისკენ სვლა მხოლოდ სულიერი ძალების მობილიზებით და საკუთარი თავისადმი რწმენის დაბრუნებით არის შესაძლებელი. ბრაზი თუ გიპყრობთ, საკუთარი თავის დადანაშაულებას ნუ დაიწყებთ, თქვენს ემოციებს მოუსმინეთ და საკუთარი თავისადმი თანაგრძნობა გამოიჩინეთ. დაფიქრდით, რის გაკეთებას ისურვებდით თავის დასამშვიდებლად, რა დაგეხმარებოდათ განწყობის გამოკეთებაში. გახსოვდეთ, რომ ოჯახის წევრებზე ზრუნვა საკუთარ თავზე ზრუნვით იწყება. თქვენ სხვებს ვერ გაუნაწილებთ ენერგიას, თუ ძალაგამოცლილი ხართ.

3. ყურადღება საკუთარ თავზე გადაიტანეთ

ჩვილობის ასაკის შემდეგ აუცილებელი არ არის, რომ საკუთარ საჭიროებებზე ყოველთვის უარი თქვათ და მთელი დრო ბავშვს დაუთმოთ. თქვენ უფლება გაქვთ სახლიდან გახვიდეთ და საქმეები მოაგვაროთ, ბავშვს კი უფლება აქვს ამის გამო გაბრაზდეს. თქვენ უფლება გაქვთ კიდევ იყოლიოთ შვილები, პირველ შვილს კი უფლება აქვს მათზე იეჭვიანოს. თქვენ უფლება გაქვთ შეიცვალოთ საცხოვრებელი ადგილი, ბავშვს კი უფლება აქვს ენატრებოდეს ძველი სახლი. ბავშვს საკუთარი თავის გაცნობის უფლება უნდა მისცეთ. მას დამოუკიდებლობა ესაჭიროება. აუცილებელი არ არის, რომ ყოველთვის და ყველგან მის გვერდით იყოთ. ​საკუთარი ცხოვრება აუცილებლად უნდა გქონდეთ, მშობლობა თქვენი ერთადერთი როლი არ არის.

4. ნუ იოცნებებთ, რომ იდეალური დედა იყოთ, უბრალოდ კარგი დედა იყავით

კვლევებით დგინდება, რომ მშობლები, რომლებიც ცდილობენ ბავშვს ყველაფერი საუკეთესო მისცენ, უფრო სწრაფად იფიტებიან და იღლებიან. იდეალებისკენ სწრაფვა მშობლებს იმდენად ღლის, რომ ისინი ამის გამო ბავშვებს უხეშად ეპყრობიან. სწორედ „იდეალური დედები“ უყვირიან ბავშვებს მაღაზიაში, როდესაც პატარები ტირიან. მათთვის მიუღებელია, რომ ბავშვმა არასასურველი ქცევა გამოავლინოს. საბოლოოდ ის მშობლები იმარჯვებენ, რომლებიც თავიდანვე ნებდებიან და აღიარებენ, რომ ისინი იდეალურები არ არიან. არ არსებობს ბავშვის სწორად აღზრდის უნივერსალური წესი. რაც უნდა გააკეთოთ, შეცდომას აუცილებლად დაუშვებთ. კარგი დედა ყოველთვის ცდილობს გააკეთოს ის, რაც შეუძლია. ის ყველაფერს არ აკონტროლებს და აღიარებს, რომ ხშირად ცდება.

5. თქვენი მოთხოვნები შეამსუბუქეთ

ინსტაგრამის ვარსკვლავ დედებს ზედმეტად ნუ მიბაძავთ. ყურადღებით დააკვირდით თქვენს მოთხოვნებს და სურვილებს. განსაზღვრეთ, კვირაში რამდენჯერ შეძლებთ სახლის დალაგებას, რამდენჯერ მოამზადებთ დღის განმავლობაში საკვებს, რამდენს დახარჯავთ ბავშვის ტანსაცმლის შესაძენად. ეცადეთ, თქვენი მოთხოვნები შეამსუბუქოთ და მხოლოდ ის აკეთოთ, რის გაკეთებასაც მშვიდად შეძლებთ. დედობა მილიონი ბურთით ჟონგლიორობას ჰგავს. ბურთების უმრავლესობა აუცილებლად გაგისხლტებათ ხელიდან. აკეთეთ მხოლოდ ის, რაც ყველაზე მნიშვნელოვანია. მარტო ყველაფერს ვერ გაუმკლავდებით. აუცილებლად ითხოვეთ დახმარება. ამაში სასირცხვილო არაფერია.

6. იპოვეთ ენერგიის წყარო

მშობლები ბავშვის აღზრდაში უდიდეს ძალას და ენერგიას ხარჯავენ. თუ ისინი ძალების აღდგენას ვერ ახერხებენ, საბოლოოდ იფიტებიან. ზოგჯერ ბავშვის გარეშე გადით სახლიდან, გაისეირნეთ, შეიძინეთ საყვარელი ნივთი ან ტანისამოსი. ნუ დაელოდებით სხვებს, შესაძლოა, ისინი ვერასდროს მიხვდნენ, რომ დასვენება გჭირდებათ. თავად მოითხოვეთ დახმარება და საკუთარ თავზე იზრუნეთ. ბედნიერი დედა ბავშვს ახალ სათამაშოზე მეტად სჭირდება. პირველი ბავშვის დაბადება დედის ცხოვრებაში ტორნადოსავითაა. მისი ყოველდღიურობა რადიკალურად იცვლება. თუ გრძნობთ, რომ ნორმალურად ფუნქციონირებას ვეღარ ახერხებთ, დახმარებისთვის ფსიქოლოგს მიმართეთ.

7. ბავშვთან კავშირი არ დაკარგოთ

შესაძლოა, ბავშვობისას, როდესაც იწყენდით ან რაიმე გაწუხებდათ, მშობლები ნოტაციებს გიკითხავდნენ, არ გეხუტებოდნენ და არ გამშვიდებდნენ. თქვენს შვილებს განსხვავებული მაგალითი უნდა მისცეთ. არ აქვს მნიშვნელობა როგორ გრძნობთ თავს და რა გაწუხებთ, ​ბავშვს ყოველთვის უნდა აგრძნობინებთ, რომ მისი გრძნობები თქვენთვისაც საგრძნობია. ბავშვმა უნდა იცოდეს, რომ მას აქვს მოწყენის, გაბრაზების, უკმაყოფილების ან შიშის უფლება. ის უნდა გრძნობდეს, რომ მშობელს მისი ესმის და მის გვერდითაა. ბავშვის სრულფასოვანი განვითარებისთვის ყველაზე მნიშვნელოვანი სწორედ ის დამოკიდებულებაა, რომელსაც მშობელი მის მიმართ ავლენს.

მომზადებულია​ adme.ru - ს მიხედვით

თარგმნა ია ნაროუშვილმა

წაიკითხეთ სრულად