რატომ არ უსმენენ თინეიჯერები მშობლებს?

ოჯახი

როგორ უნდა მიხვდეთ, თქვენს მეორე ნახევარს ძველებურად უყვარხართ თუ არა?

3 თვის წინ

ხანგრძლივი თანაცხოვრების შემდეგ მეუღლეებს შორის სიყვარული ხშირად ნელდება. როგორ უნდა მიხვდეთ, თქვენს მეორე ნახევარს ძველებურად უყვარხართ თუ არა? ჩვენს სტატიაში იმ უტყუარ ნიშნებზე გესაუბრებით, რომელთა მეშვეობით ადვილად მიხვდებით, რამდენად ძლიერია გრძნობა, რომელიც თქვენს მეუღლეს თქვენ მიმართ აქვს.
​

1. ის ყოველთვის თვალებში გიყურებთ
​

ერთად სადილობისას თქვენი მეუღლე ტელეფონში არ დაძვრება და არც აქეთ-იქით იყურება. მისი მზერა ყოველთვის თქვენკენ არის მომართული. თქვენი მეუღლე გულისყურით გისმენთ და ყველაფერი აინტერესებს, რასაც ეუბნებით. საუბრისას თვალებში გიყურებთ და მაქსიმალურად ცდილობს, არაფერი გამოეპაროს, რასაც ამბობთ. უახლესი კვლევებით დგინდება, რომ შეყვარებული წყვილები ერთად ყოფნისას დროის 75 %-ს ერთმანეთის ყურებაში ატარებენ, ხოლო ის პარტნიორები, რომლებმაც ერთმანეთისადმი ინტერესი დაკარგეს, ერთმანეთის ყურებაში მხოლოდ დროის 30-60 %-ს ხარჯავენ. როდესაც თქვენ შორის ძლიერი კონტაქტია და მისი თვალები გამუდმებით თქვენს თვალებს ეძებს, ე.ი. მეუღლე თქვენზე ძველებურად შეყვარებულია.
​

2. ის ყოველთვის ერთსა და იმავეს გიმეორებთ: „როგორც შენ გინდა!“

ზოგიერთი ქალბატონი სიტყვებს: „როგორც შენ გინდა“ მეუღლის მხრიდან გულგრილ დამოკიდებულებასთან აიგივებს. ფსიქოლოგები კი გვარწმუნებენ, რომ შეყვარებული მამაკაცები ურთიერთობისას გაცილებით ნაკლებ ენთუზიაზმს ავლენენ, ვიდრე ქალბატონები. შეყვარებულ ქალბატონებს ოგრანიზმში სეროტონინის გამომუშავება ძალიან მაღალი აქვთ, რის გამოც ისინი ბედნიერების გამოსახატად ათას ორიგინალურ ჟესტსა და ქცევას მიმართავენ. მამაკაცებში სეროტონინი ამ დოზით არ გამომუშავდება. მათთვის მთავარია საყვარელ ქალს სიამოვნება მიანიჭონ და ყველაფერი ისე გააკეთონ, როგორც ეს მათ რჩეულს სურს. ისინი თქვენთან ერთად სიამოვნებით გაატარებენ მთელ საღამოს ტელევიზორის ეკრანთან, თუ ეს გაგაბედნიერებთ. თუ პაემანისთვის იდეალური ადგილის შერჩევაში თქვენ მაქსიმალურად იხარჯებით, თქვენი ქმარი კი პასიურობს, იმედი არ უნდა გაგიცრუვდეთ. თუ ის ყველაფერს ისე აკეთებს, როგორც თქვენ გსურთ, ე.ი. უყვარხართ და გენდობათ. იმის ნაცვლად, რომ დეპრესიაში ჩავარდეთ, ახალი იდეების მოძიებაზე იზრუნეთ და თქვენი ურთიერთობა მაქსიმალურად გაამრავალფეროვნეთ.
​

არ დაგავიწყდეთ !!!

Mom​sEdu.ge-მ თქვენთვის, ქალებისთვის შექმნა ახალი სივრცე, სადაც ყველაზე მცოდნე დედები იყრიან თავს. ჯგუფის დასახელებაც სწორედ ასეა - „მცოდნე დედების ჯგუფი“, რომლის საშუალებით დედები ერთმანეთს საკუთარ გამოცდილებას გაუზიარებენ. (ჯგუფში გასაწევრიანებლად ნახეთ ბმული - „მცოდნე დედების ჯგუფი“)

3. მეუღლე სექსის დროს სახელით მოგმართავთ
​

დღის განმავლობაში მეუღლეები ერთმანეთს ხშირად მიმართავენ სიტყვებით: „საყვარელო“ ან „ძვირფასო“. ეს სავსებით ნორმალური მოვლენაა. თუ თქვენი ქმარი სექსის დროს სახელით მოგმართავთ, ეს იმას ნიშნავს, რომ ის თქვენზე თავდავიწყებით არის შეყვარებული. ინტიმური ურთიერთობისას ის მხოლოდ თქვენზე ფიქრობს და თქვენთან ურთიერთობა მისთვის ძალიან სასიამოვნოა. თქვენი სახელის ხშირი გამეორება იმაზე მიანიშნებს, რომ თქვენს ქმარს სხვასთან წასვლის სურვილი ნამდვილად არ აქვს და თქვენთან ურთიერთობით უზომოდ კმაყოფილია. თუ საძინებელში მისი მზერა გამუდმებით თქვენკენ არის მომართული, ეს იმას ნიშნავს, რომ მისთვის თქვენი შეგრძნებები და განცდები ძალიან მნიშვნელოვანია.
​

4. მას თქვენ ჩუმად უყვარხართ
​

შეყვარებულობის საწყის ეტაპზე თქვენი მომავალი მეუღლე ხელს ვერ გიშვებდათ. ის ყოველთვის თქვენს შეხებას ცდილობდა. ხანგრძლივი თანაცხოვრების შემდეგ პერმანენტული ფიზიკური სიახლოვის მოთხოვნილება ნელ-ნელა მინელდა და თქვენ გადაწყვიტეთ, რომ მისი სიყვარული ისეთი ძლიერი აღარ არის, როგორიც ადრე. დროთა განმავლობაში თქვენი მეუღლე სიყვარულის გამოხატვას სხვა ფორმით იწყებს. შეყვარებულობის პერიოდში ახალი ურთიერთობით აღფრთოვანება თქვენს ორგანიზმში დიდი რაოდენობით დოფამინის გამომუშავებას უწყობს ხელს. აღნიშნული ნეიროტრანსმიტერი თქვენზე ისე მოქმედებს, როგორც ძლიერი ნარკოტიკი და მისი გავლენით გამუდმებული ფიზიკური სიახლოვის მოთხოვნილება გიჩნდებათ. აღფრთოვანება, რომელიც ურთიერთობის დაწყებას ახლავს თან დაუვიწყარია, მაგრამ დროებითი.
​

ეიფორიის გაქრობასთან ერთად წყვილი ნამდვილ სიყვარულს სწავლობს. რელაქსაციისა და განტვირთვის შემდეგ ურთიერთობა სხვა ფაზაში გადადის და შეყვარებულები ერთმანეთისადმი შედარებით გაწონასწორებული, მაგრამ ღრმა გრძნობით განიმსჭვალებიან. თუ თქვენი მეუღლე გამუდმებით თქვენს შეხებას არ ცდილობს, ეს იმას არ ნიშნავს, რომ მას აღარ უყვარხართ. ის სიყვარულს სხვაგვარად გამოხატავს.
​

5. ის წვეულებაზე წუწუნის გარეშე მოგყვებათ
​

თუ თქვენი საუკეთესო მეგობარი წვეულებაზე გეპატიჟებათ, თქვენს მეუღლეს კი წამოსვლა არ სურს, მაგრამ მაინც წუწუნის გარეშე მოგყვებათ, ის ამ ჟესტით თქვენდამი პატივისცემასა და სიყვარულს გამოხატავს. როდესაც მეუღლეს თხოვთ, რომ წვეულებაზე გამოგვეთ, ის კი ზედმეტი კითხვების გარეშე შესაფერის ტანისამოსს იცვამს და თქვენთან ერთად მოდის, ამ საქციელით თქვენი საყვარელი მამაკაცი საკუთარ სურვილებსა და გემოვნებას არაფრად აგდებს, რაც ამტკიცებს, რომ მისთვის ყველაზე მნიშვნელოვანი ადამიანი თქვენ ხართ. თქვენი მეუღლე მსხვერპლს არ გაიღებდა თქვენზე თავდავიწყებით რომ არ იყოს შეყვარებული.
​

6. ის კამათის სწრაფად დასრულებას ცდილობს
​

საყვარელი მამაკაცის მხრიდან სიყვარულის კიდევ ერთ უტყუარ მტკიცებულებას კამათისა და უთანხმოების სწრაფად დასრულების მცდელობა წარმოადგენს. თუ თქვენი მეუღლე საშუალებას გაძლევთ კამათში ყოველთვის მართალი გამოხვიდეთ და თქვენს საწინააღმდეგოდ არგუმენტების მოძიებას არ ცდილობს, ეს იმას ნიშნავს, რომ მისთვის საკუთარი სიმართლის დამტკიცებაზე მნიშვნელოვანი ურთიერთობის სიმყარის შენარჩუნებაა. თქვენს მეუღლეს არ სურს, რომ გული გატკინოთ და უსიამოვნო სიტყვებით ჭრილობა მოგაყენოთ, რადგან მან იცის, რამდენად დამანგრეველია ურთიერთობისთვის დაუფიქრებელი სიტყვებით საუბარი და ერთმანეთისთვის მოუშუშებელი სულიერი იარების მიყენება. შემდეგ ჯერზე, როდესაც მეუღლესთან კამათს დაიწყებთ, იმის ნაცვლად, რომ თქვენი სიმართლის დამტკიცებაზე იზრუნოთ, ეცადეთ დათმობაზე წახვიდეთ და პრობლემების ერთობლივად მოგვარება სცადოთ.
​

7. თქვენთან დროის სასიამოვნოდ გატარების მიზნით, ის ტელეფონსა და კომპიუტერს თავს ანებებს
​

თანამედროვე ადამიანების უდიდესი ნაწილი ტელეფონსა და ინტერნეტს არის მიჯაჭვული. თუ თქვენი მეუღლე თანამედროვე ტექნოლოგიების გამოყენებაზე დროებით უარს ამბობს, რათა თქვენთან ერთად დრო სასიამოვნოდ და საინტერესოდ გაატაროს, ე.ი. ის თქვენზე თავდავიწყებით არის შეყვარებული. როდესაც მამაკაცს ქალი უყვარს, არ აქვს მნიშვნელობა, რამდენად დატვირთული სამუშაო გრაფიკი აქვს, ის აუცილებლად გამონახავს დროს, რათა ტელეფონი და კომპიუტერი დროებით გვერდით გადადოს და მეუღლეს სათანადო ყურადღება დაუთმოს. ეს იმას არ ნიშნავს, რომ თქვენს მეორე ნახევარს სამსახურისთვის თავის დანებება უნდა მოთხოვოთ. თუ ის დროის რაციონალურად გადანაწილებას ახერხებს და კარიერული მიზნების გამო უყურადღებოდ არ გტოვებთ, ე.ი. უყვარხართ.
​

8. თუ სამზარეულოში ფუსფუსი არ გიყვართ, ის თეფშებს თქვენს ნაცვლად რეცხავს
​

ხანგრძლივი თანაცხოვრების შემდეგ თქვენმა მეუღლემ თქვენ შესახებ ყველაფერი იცის. მისთვის ცნობილია, რა მოგწონთ და რა გაღიზიანებთ. შეყვარებული მეუღლე ყოველთვის ეცდება თავიდან აგარიდოთ ისეთი საქმის გაკეთება, რომელიც არ მოგწონთ. თუ ქმარს ძველებურად უყვარხართ, ის ყველაფერს გააკეთებს იმისთვის, რომ თავი კარგად გაგრძნობინოთ. თუ თქვენმა მეუღლემ იცის, რომ თეფშების რეცხვა საშინლად არ გიყვართ, ის ყველანაირად ეცდება, რომ ეს საქმე თქვენს ნაცვლად გააკეთოს. მოსიყვარულე მეუღლე სკანდალს არ მოგიწყობთ, თუ საღამოს სამზარეულოს ნიჟარა გაურეცხავი თეფშებით გექნებათ სავსე. თუ შეამჩნევთ, რომ თქვენი ქმარი თეფშებს თქვენს ნაცვლად რეცხავს მადლობა აუცილებლად უნდა გადაუხადოთ. ეცადეთ, თქვენ ისეთი საოჯარო საქმით დაკავდეთ, რომელიც თქვენს მეუღლეს არ ხიბლავს. ერთმანეთის თანადგომა და გაფრთხილება სიყვარულის უმთავრესი ნიშანია.
​

9. ის სიტყვა „განქორწინებას“ არასდროს ახსენებს
​

ნებისმიერ წყვილს ცხოვრებაში ერთხელ მაინც აქვს სერიოზული უთანხმოება. არ აქვს მნიშვნელობა რამდენად მძაფრია თქვენს შორის დაპირისპირება, თუ თქვენს მეუღლეს უყვარხართ, ის სიტყვა „განქორწინებას“ არასდროს ახსენებს. შეყვარებული მამაკაცი ურთიერთობის დანგრევაზე არასდროს იფიქრებს, არ აქვს მნიშვნელობა რამდენად გულნატკენი, გაბრაზებული ან იმედგაცრუებულია იგი. განქორწინებაზე საუბარი ურთიერთობას სიკეთეს არასდროს მოუტანს. განცდა იმისა, რომ თქვენი ერთად ყოფნა, შესაძლოა, დროებითი მოვლენა იყოს და სამომავლოდ ცხოვრება ცალ-ცალკე უნდა გააგრძელოთ, თქვენს ურთიერთობას ანგრევს. შეყვარებულმა მამაკაცმა ყოველთვის იცის, რომ კონფლიქტის მოგვარებაზე უნდა იზრუნოს. წყვილის ცხოვრებაში უსიამოვნება არაერთხელ იჩენს თავს. ღირსეული მამაკაცი ნებისმიერი დაპირისპირებისთვის მზად უნდა იყოს.
​

10. მას თქვენთვის სიურპრიზების მოწყობა ძველებურად სიამოვნებს
​

თუ თქვენი მეუღლე ძველებურად ცდილობს თქვენს გახარებას და თქვენი ყოველდღიურობის გამრავალფეროვნებას, ე.ი. მას ძველებურად უყვარხართ. არ არის აუცილებელი, რომ მან გამუდმებით ძვირადღირებული ნივთებით დაგასაჩუქროთ. თქვენი საყვარელი ტკბილეულის ან ნაყინის შეძენაც კი მის სიყვარულსა და მზრუნველობაში დაგარწმუნებთ. შეყვარებულ მამაკაცს არ დაავიწყდება, რომელი ფილმის ნახვა გსურთ ახლო მომავალში. ის სასურველი კინოსეანსის ბილეთით აუცილებლად დაგასაჩუქრებთ. თუ მეუღლისთვის მნიშვნელოვანი ადამიანი ხართ, ის ეცდება თქვენი ურთიერთობა სიახლეებითა და სიურპრიზებით გაამდიდროს. შეყვარებული მამაკაცი გამუდმებით გაგრძნობინებთ, რომ თქვენზე ფიქრობს და ძალ-ღონეს არ დაიშურებს, რათა გაღიმებული და ბედნიერი გნახოთ. 
​

მომზადებულია ​www.womansday.com-ის მიხედვით
​

თარგმნა ია ნაროუშვილმა

წაიკითხეთ სრულად